| 強者有買趁祖 23/02/2012
文： 笛子波童
周五早上續演自由盃分組賽，A組玻利維亞強者主場鬥秘魯祖安奧列治。強者正如其名，首輪分組賽擊敗上屆冠軍山度士實力唔嘢小，由於同組仲有勁敵國際體育會，面對實力最弱嘅祖安奧列治更加冇失分空間，一於捧1.78倍「讓球主勝」。
強者首場分組賽充分發揮強者本色，主場落後一球之下，反勝去屆盟主巴西山度士二比一，嗰場比賽山度士主力包括尼馬、甘素、漢歷基柏查高及上季巴甲神射手波捷斯全部有份落場，絕冇留力成分，可見強者確有真材實料，贏波唔係靠符碌。而且強者來自玻利維亞，有高原地利之助，任何球隊作客都唔易全身而退。
拉魯斯「+1」攞着數
由於呢組仲有另一支巴甲勁旅國際體育會，國體會首輪分組賽順利以二比○擊敗祖安奧列治，此組出線席位好大機會由強者、國體會及山度士爭奪，所以強者今次主場迎戰祖安奧列治更加不容有失，1.24倍主W冇肉食，索性捧1.78倍「讓球主勝」。
另外兩場賽事，B組巴拉圭奧林比亞會主場鬥阿根廷拉魯斯，拉魯斯阿甲開咧頭兩輪全勝，上場自由盃分組賽亦打和巴甲勁旅法林明高，狀態火速入局，面對近三仗僅入一球嘅奧林比亞會有力保不敗，受讓之下捧「讓球客勝」。最後C組智利天主教大學主場鬥哥倫比亞青年體育會，青年體育會對上五場作客輸三和二，表現靠唔住，捧有主場之利嘅天主教大學。
|
